भौजी आंगें न जाओ भौजी आंगें न जाओ|
गैल में लड़ईया बैठो बैटरी बताओ |
टिंगरन – टिंगरन भरो है पानी और मिंदरा टर्रा रए |
डरके मारें भौजी मोरे हाड़ कंपकंपा जा रए |
कीचड़ में री भौजी मोरे गोड़े गप- गप जा रए |
जरियों के काँटों में मोरे कपडा बिद- बिद जा रए |
इतनी न इतराओ इतनी न इतराओ |
गैल में लड़ईया बैठो बैटरी बताओ |
देखो भौजी मोरी तोसें नइयाँ कछु लड़ाई |
भैया सें तो करत हों तोरी रोजई बहुत बढाई |
हाथ जोड़कें करत हों बिनती बक दे मोरी माई |
का कारन सें है तें गुस्सा बतला देवी दाई |
हमखों यूं न सताओ ,हमखों यूं न सताओ |
गैल में लड़ईया बैठो बैटरी बताओ |
भौजी उवाच काम करत दिन भर खेतन में अंग -अंग मोरो थक गओ |
मोखों तो रोटी एकई दई पंदरा खुदई गुटक गओ |
मैं तो भूखन मरी जा रही ईसें आगे जा रई |
तें तो अफरो रोटी खाकेँ तोय सरम ने आ रई |
अब चाये रोओ या गाओ , अब चाये रोओ या गाओ |
गैल में लड़ईया बैठो बैटरी बताओ |
देवर उवाच
हाथ तुम्हारे जोड़त भौजी अब ने गलती कर हों |
भ्याने सें सब की सब रोटी तोरे आंगें धरहों |
तें सबरी खा लइये भौजी मैं चूँ तक ने करहों |
भुन्सारे सें रोजई भौजी पाँव तुम्हारे पर हों |
आकें हमखों बचाओ ,आकें हमखों बचाओ |
गैल में लड़ईया बैठो बैटरी बताओ |
सुन कें भौजी दौरि पाछें देख देउर की हालत |
देखि ने जा राइती ऊँसें लाला की जा दुर्गत |
जरियों के काँटों से कपड़ा अलग कर दये झटपट |
अब तो प्यारो लगन लगो तो नन्हों देवर नटखट |
ले गोदी में उठाओ ,ले गोदी में उठाओ |
गैल में लड़ईया बैठो बैटरी बताओ |
